الحقيقة نحن العرب بنخترع اشياء و تعابير مستحيل تلاقيلها تفسير بي أي لغة بالعالم, و من هل التعابير " بفرحتك" أو "عقبالك" نفس المعنى و المغزى. يلي بيقول هل شي بيقولوه عن طيبة خاطر أو امنية بريئة أو شريرة اذا كان "تزوج" ووقع "بالفخ"بس من كتر ما بيقولوها بتحس عم يقولوك من الاخر ايمتى حنخلص منِك أو منك كأنك قاعد على كتافهم!!
و عنا بلبنان ما بتتخايلوا شو بنستعملها ...كل ما واحد اكل شي اكلة انجبر فيها عند ناس أو انعزم عليها هو و عم " يضحك و يلعب " لازم يختم الوجبة تعيته بالكلمة السحرية "بفرحتهم" أو "بفرحت فلان او فلانة" خلص كول و سكوت شكرا" بتكفي , و كل ما انبسط أو عطس شي عطسة أو فرحلوه شي فرحه أو انجبر يروح شي مناسبة , لازم لما يكون موجود بي مكان بيحمل هيك طابع من الفرحة او المناسبة لازم يقولوا كل يلي بالعرس او الخطبة اوطهور أو ولادة او سبوع شو يا شاطرين؟؟ شو؟ شو؟ صح! بيقولوا "بفرحتِك او عقبالِك" !! و بالمذكر اذا كان شاب, و خاصة انه الشاب اكره شي عليه انه يخسر حريته . ولو مين ما بيحب يضل عصفور طيار !!
التعبير صار مزعج و بينقال كتير, يعني لو بقدر اجمع كم مرة ناس قالولي هل تعبير يمكن كان اتسجل اسمي بموسوعة "غينس" !! وساعات ناس بيكون فترة طويلة ما شافتك او ما بتسألك تجوزت ؟خطبت ؟ خلفت ؟ ( بس تكون صبية متل حضرت جنابي ) .
بالاول كنت حس الكلمة عادية بس بعدين صارت مزعجة و بتضايق , يعني بيعطوني احساس انه انا بكرا حا موت و لازم يضلوا يقولوا عقبالك لتوقع الواقعة ! جزاكم الله كل خير بس انه في اشياء تانية بالحياة تتمنوه , و بعدين هيدا الشي مش على ذوقي او ذوق غيري, لأن القصة مش لعبة يعني مجرد الزواج للزواج و تبعاته, هيدا اصعب قرار ممكن انسان ياخده و قبل القرار في شي انه يصير وقته و يصير المكتوب .
الزواج و العيلة شي لابد منه بي هل الحياة و هي اصلا" اصل الوجود لكن الانسان ما هو يلي بيفتش عليه او بيعمل شي ليوصله هو شي رباني و "قسمة و نصيب" , شي "قدري" , يعني اذا أي شخص بيعيش 20 سنة بس عم يقولي "بفرحتِك او عقبالِك" ما حيصير اي شي اذا ما كان وقت "القسمة و النصيب" .
طب ممكن انا ما بدي اتجوز لعشر سنين مثلا"! او ما بدي اتجوز ابدا"! أو ممكن كون معقدة نفسيا" من الرجل و بدي صير "عانس" كون هيدا مصطلح اجتماعي, بس انا ما بعتقد بوجوده,لأنه من الأشياء يلي هي "مقدر و مكتوب" وفي يكون بكل بساطة انه الشخص و الوقت المناسب ما صار وقته. يعني بيمضوا حياتهم عم يقلولوا "بفرحتِك" أو "عقبالِك" و اتضيع دعواتهم على الفاضي, عنجد انا كرمال ما يتعبوا و يصرفوا أوكسجين و ثاني اوكسيد الكربون لما يقولوها كل مرة. و اذا كانت حالة شاب ما بيفكروا انه ممكن يكونوا عم يوجعوه بهل الكلمة لأن ممكن يكون كتير بحاجة يتجوز لحاجاته و رغباته وفي انسانة بحبهاوما قادر ماديا" بكتير من الأحيان . و أحيان أخرى هو الشاب ما بيكون بباله هل الموضوع لأن ما بده يفقد حريته و يتقيد بالزواج بس ما هيدا موضوعنا.
انه يعني المهم قلنا! لازم الناس تفكر شو بتقول لغيرها لأن ممكن كلمة تكون تافهة بنظر انسان و تكون سهم للأنسان التاني. التعبير من برا شكله "حلو" بس من جواته لاء لأن في معاني كتيره بتزعج! خلص كل واحد حر بحياته يعمل الشي يلي بيريح و لازم دايما" نذكره انه في شي ناقص , أو انه في واجب بهل الحياة بعد ما انجزه أو انه شي اذا ما معله "بتخلص الدنيا" , لازم نترك كل انسان حر بحياته و ما نعمل اي شي بيزعجه و خاصة بي هيك موضوع حساس ما حدا بيقدر يقرر فيه شي أو يتحكم فيه..
بعد يلي كتبته حسيت اني مجنوني بعض الشيء! أو يمكن لأن الموضوع صار بيستفزني كتير! و الناس صارت كل ما تنبسط شوي بترفع هل كلمة شعار !
ليست هناك تعليقات:
إرسال تعليق